أمور يجب مراعاتها عند كتابة عقد بيع شقة أو بيع محل

عند كتابة عقد بيع فيه امور يجب مراعاتها , وايضاحها في العقد حتى ولو كان القانون يكفلها في حالة عدم النص , وذلك لان النص عليها واضحة يجعلها رادعة لكلا الطرفين , ويوفر اللجوء للقضاء ,وبالتالي يوفر اتعاب المحامي اللي كل الناس باصلهم فيها  
وبدلا من ان تقول عايز محامي ييجي معايا وانا بكتب عقد شقة وبكام 
اسأل بشكل افضل : ايه الامور اللي اخد بالي منها وانا بكتب عقد بيع 
وعشان احنا محامين طيبين هنقولكم على اسرار كتابة عقد البيع 

1- مستندات الملكية 

فضلا عن تسلسلها , لكن لازم التأكد من وجود واقع يصدق هذه المستندات
يعني ايه البائع يقدملك عقد وعليه ختم محكمة صحة توقيع يبقى خلاص كده ؟ ما اي اتنين ممكن يعملوا عقد بيع ابو الهول وياخوا عليه صحة توقيع كمان !!
انما لازم مع تسلسل الملكية يكون الواقع مصدق لهذه المستندات , يعني ايصال كهرباء , ايصال غاز , ايصال مياه ,( ايصال امانة مايضرش برضه  )

2- المنافع

وللشقة المبيعة حصة في منافع العقار ...الخ
ركز هنا بقى عشان الواقع العملي بيقول 50% من المشاكل بتيجي من هنا
لازم تذكر صراحة في العقد عشان ترتاح بعد كده الاتي :
وللشقة المبيعة حصة في منافع العقار بالتساوي مع باقي وحدات وشقق العقار وهذه المنافع هي : الجراج , السطح , فناء ومدخل العقار , السلم , المناور ...الخ
ولو الشقة هتفتحها مكتب او شركة , ضيف كمان : وواجهة العقار ( عشان تحط يافطتك )
وركز على الفناء عشان تحط عربيتك لو مفيش جراج
وركز على السطح بدل ما تلاقي البائع كل شوية بيرميلك طبق الدش من فوق

3- مطابقة العقار الذي به الشقة المبيعة للتراخيص والرسومات الهندسية المعتمدة

ايون .. اكتبها كده ان البائع اقر بذلك وعلى مسئوليته

4- الشقة غير مشطبة او نصف تشطيب

في بند المعاينة التامة النافية للجهالة تذكر المعاينة دي كأنك امين شرطة وجاي يعمل محضر اثبات حاله

5- في حالة البيع بالقسط

اجعل دائما كل قسط معلق على إلتزام مقابل من البائع
عشان يديلك حق حبس الثمن لو اتأخر في تنفيذ إلتزامه
مش ييجي يقولك معاد القسط يا افندي وإلا هفسخ واخد الشرط الجزائي
ويكون هو اصلا لسه مشطبش الشقة مثلا ,او حتى لسه مبناش الدور اللي في الشقة اللي باعهالك 

6- توكيل خاص

من الافضل وجوده خاصة لو كانت شقة متشطبة وراكبة عدادات , عشان تقدر تتعامل بسهولة امام الجهات المختصة في نقل والغاء وتركيب العدادات
7- مش فاكر كفاية كده الباقي معروف زي احكام الضمان والاستحقاق وحقوق الغير ..الخ الخ
انا ذكرت النقط اللي دائما بتحصل بسببها مشاكل
او اللي صادفني بحكم المهنة من مشاكل بسببها
#أحمد الاسيوطي المحامي